Thursday, May 10, 2012

អាចនឹងមាន​ការរៀបចំ​ផែនការ​សង់ផ្លូវ​ក្រោមទន្លេ


ភ្នំពេញៈ ការកកស្ទះ​ចរាចរណ៍​កាន់តែ​ច្រើនឡើងៗ នៅតាម​ដងផ្លូវ និង​មហាវិថី​នានា នៃ​រាជធានី​ភ្នំពេញ អាចនាំឲ្យ​អ្នករៀបចំ​ផែនការ​ដឹកជញ្ជូន ចង់កសាងផ្លូវ​នៅក្រោម​ទន្លេសាប​។ នេះបើយោងតាម​សេចក្តី​ថ្លែងការណ៍​ផ្លូវការ​មួយនៅ​សប្តាហ៍នេះ​។
សេចក្តី​ប្រកាស ដែលត្រូវបាន​គេចាត់ទុកថា ជា​របស់​មន្រ្តី​មូលដ្ឋានម្នាក់ ដែល​សុំ​មិន​បញ្ចេញ​ឈ្មោះនេះ ត្រូវបាន​គេ​បង្ហោះ​កាលពី​ថ្ងៃ​ពុធ នៅលើ​គេហទំព័រ​របស់​សាលា​រាជធានី​ភ្នំពេញ​។
សេចក្តី​ប្រកាសនេះ​បានសរសេរ​បន្តទៀត​ថា​៖ «​កំណើន​សេដ្ឋកិច្ច​ឆាប់រហ័ស របស់​កម្ពុជា បានធ្វើឲ្យ​រាជធានី​ភ្នំពេញ​មមាញឹក​ជាងមុន​។ រាជធានី​នៅពេល​បច្ចុប្បន្ននេះ មាន​ប្រជាជន​ជិត ២លាន​នាក់​។ បញ្ហា​ចរាចរណ៍ កំពុងតែ​ស្មុគស្មាញ​»​។
ខណៈ​ដែលមិនមាន​ការរៀបរាប់​លម្អិត​បន្ថែមទៀត លើការកំណត់​ការសាងសង់ ឬ​កម្រិត​នៃ​ការគូរប្លង់ ផ្លូវ​ក្រោមដី ដែល​ពុំធ្លាប់​មាននៅ​កម្ពុជា​នោះ គំនិតនេះ បានកើតមាន បន្ទាប់ពី​ផ្លូវចូល​ក្រុងផ្សេងៗទៀត ព្យាយាម​កាត់បន្ថយការ​កកស្ទះ​ចរាចរណ៍​តាមរយៈ​ការកសាង​ស្ពាន​អាកាស​។
កាលពី​ចុងខែ​មេសា គណៈ​ប្រតិភូ​រាជធានី​ភ្នំពេញ​មួយក្រុម បាន​ធ្វើដំណើរ​ទៅប្រទេស​វៀតណាម ហើយ​បាន​មើលផ្លូវក្រោមដី ដែលមាន ៦ ខ្សែ កាត់ពី​ក្រោមទន្លេសាយហ្គន ក្នុង​ទីក្រុងហូជីមិញ​។
ប្រធាន​មន្ទីរ​សាធារណៈ រាជធានី​ភ្នំពេញ លោក សំ ពិសិដ្ឋ បានថ្លែង​នៅពេលនោះថា ផ្លូវក្រោម​ទន្លេសាប នៅរាជធានី​ភ្នំពេញ អាចជា​ផ្លូវ​មួយ​ទៀត ដើម្បីកាត់បន្ថយ​ការកកស្ទះ​ចរាចរណ៍​។
រាជធានី​ភ្នំពេញ​បច្ចុប្បន្ន មានស្ពាន​អាកាស​ចំនួន​ពីរ មួយ​នៅក្បាលថ្នល់ ស្ថិតក្នុង​ខណ្ឌ​មានជ័យ និង​មួយទៀត​នៅក្បែរ​មន្ទីរពេទ្យ​លោក សង្ឃ ស្ថិតក្នុង​ខណ្ឌ​ទួលគោក ដែល​ស្ពានអាកាស​ទាំងពីរនេះ បានជួយកាត់​បន្ថយ​ស្ទើរតែ​ទាំងស្រុង នូវការកកស្ទះ​ចរាចរណ៍ ដែល​តែងតែ​កកស្ទះ​ជាប្រចាំ​នៅក្នុង​តំបន់​ទាំងពីរនេះ​។ សាលា​រាជធានី ក៏មាន​គម្រោងសាងសង់​ស្ពានអាកាស​បន្ថែមទៀត នៅតាមផ្លូវ​បំបែក​មួយចំនួនផងដែរ​៕ NR

People who read this post also read :